వారసత్వం కేవలం ఆస్తులకే పరిమితం కాదని, పట్టుదల ఉంటే కీర్తి ప్రతిష్టలను కూడా వారసత్వంగా అందుకోవచ్చని నిరూపించాడు ఆంధ్రప్రదేశ్కు చెందిన యువ వెయిట్లిఫ్టర్ వల్లూరి అజయబాబు. గ్లాస్గో వేదికగా జరుగుతున్న కామన్వెల్త్ క్రీడల్లో అజయబాబు అద్భుత ప్రదర్శనతో మెరిశాడు. వెయిట్లిఫ్టింగ్ విభాగంలో గట్టి పోటీని ఎదుర్కొంటూ అజయబాబు రజత పతకాన్ని సాధించి దేశానికి, తెలుగు రాష్ట్రాలకు పేరు తెచ్చాడు.
విజయనగరం జిల్లా కొండవెలగాడకు చెందిన అజయబాబు ప్రయాణం ఎంతో స్ఫూర్తిదాయకం. తండ్రి వల్లూరి శ్రీనివాసరావు సైన్యంలో పనిచేస్తూ.. 2010 ఢిల్లీ కామన్వెల్త్ క్రీడల్లో 56 కేజీల విభాగంలో కాంస్య పతకం సాధించారు. తండ్రిని ఆదర్శంగా తీసుకుని వెయిట్లిఫ్టింగ్లోకి అడుగుపెట్టిన అజయబాబు.. తండ్రి శిక్షణలోనే మెట్లు మెట్లుగా ఎదుగుతూ జాతీయ, అంతర్జాతీయ స్థాయిలో వరుస పతకాలు సాధించాడు. ప్రస్తుతం తండ్రిలాగే భారత సైన్యంలో సేవలు అందిస్తూనే, క్రీడల్లోనూ అంచలంచెలుగా ఎదుగుతూ దేశ పతాకాన్ని అంతర్జాతీయ వేదికపై సగర్వంగా ఎగరవేస్తున్న అజయబాబు విజయం ప్రతి ఒక్కరికీ గర్వకారణంగా నిలుస్తుంది.
