Ram Gopal Varma: ప్రయోగాల దర్శకుడు రామ్గోపాల్ వర్మ తొలిసారిగా హీరోగా మారనున్నారు. తన జీవితాన్ని ఆధారంగా చేసుకుని ‘షో మ్యాన్’ సినిమా తెరకెక్కిస్తున్నారు. ఇందులో సీనియర్ నటుడు సుమన్ విలన్గా నటిస్తున్నారు. ఈ విషయం గురించి పూర్తి వివరాలు చూద్దాం.
సంచలనాలకు మారుపేరైన రామ్గోపాల్ వర్మ మరో అడుగు ముందుకేస్తున్నారు. ఇప్పటివరకు దర్శకుడిగా ఎన్నో సినిమాలు తెరకెక్కించిన ఆయన ఇప్పుడు కెమెరా ముందుకు వచ్చేస్తున్నాడు. ‘షో మ్యాన్’ పేరుతో తానే నాయకుడిగా నటిస్తూ, స్వయంగా కథాంశం రూపొందించారు. ‘మ్యాడ్ మాన్స్టర్’ అనే ట్యాగ్లైన్తో ఈ చిత్రం ఆయన స్టైల్ను పూర్తిగా ప్రతిబింబిస్తోంది. గ్యాంగ్స్టర్, అండర్వరల్డ్ కథలతో కెరీర్ మొత్తం గడిపిన వర్మ ఇప్పుడు తనదైన జీవన శైలిని తెరపై ఆవిష్కరించబోతున్నారు.
ఇందులో సీనియర్ నటుడు సుమన్ ప్రతినాయకుడిగా కనిపించనున్నారు. రజినీకాంత్ వంటి దిగ్గజాలతో విలన్ పాత్రలు పోషించిన సుమన్తో వర్మ సన్నివేశాలు ఈ చిత్రానికి ప్రధాన ఆకర్షణ కానున్నాయి. కొత్త దర్శకుడు నూతన్ ఈ చిత్రంతో ఇండస్ట్రీలో అడుగుపెడుతున్నాడు. తుమ్మలపల్లి రామసత్యనారాయణ నిర్మిస్తున్న ఈ సినిమా షూటింగ్ జోరుగా సాగుతోంది.
