మెదడులో ఏమన్నా ఉందా.. ఆకాశ్ దీప్‌ను తిట్టిన రోహిత్ శర్మ.. స్టంప్‌మైక్‌లో రికార్డైన మాటలు
Akash Deep: గబ్బా టెస్టులో టీమిండియా కెప్టెన్ రోహిత్ శర్మ.. భారత బౌలర్‌ ఆకాశ్ దీప్‌పై ఆగ్రహం వ్యక్తం చేశాడు. ఆస్ట్రేలియా తొలి ఇన్నింగ్స్‌ సందర్భంగా ఆకాశ్ దీప్ భారీ వైడ్ వేశాడు. ఇది చూసిన కెప్టెన్.. త‌ల‌కాయ‌లో ఏమైనా ఉందా అంటూ ఆకాశ్‌ను తిట్టేశాడు. ఈ మాటలు స్టంప్‌మైక్‌లో రికార్డయ్యాయి. ఇందుకు సంబంధించిన వీడియో సోషల్‌ మీడియాలో వైరల్‌ అవుతోంది. మూడో టెస్టులో మూడో రోజు ఆట ముగిసే సరికి ఆస్ట్రేలియా పటిష్ట స్థితిలో నిలిచింది.
బోర్డర్ గవాస్కర్ ట్రోఫీ మూడో టెస్టులో భారత్ కష్టాల్లో పడింది. బౌలింగ్, బ్యాటింగ్‌లో తేలిపోయి.. ఓటమి దిశగా సాగుతోంది. ఈ మ్యాచ్‌లో తొలుత బ్యాటింగ్ చేసిన ఆస్ట్రేలియా 445 పరుగుల భారీ స్కోరు చేసింది. ట్రావిస్‌ హెడ్‌, స్టీవ్‌ స్మిత్‌లు సెంచరీలతో చెలరేగిపోయారు. భారత బౌలర్లలో బుమ్రా మినహా.. మిగతావారంతా తేలిపోయారు. ముఖ్యంగా హర్షిత్ రాణా ప్లేసులో జట్టులోకి వచ్చిన ఆకాశ్ దీప్ నిరాశపరిచాడు. 30 ఓవర్లు బౌలింగ్ వేసి ఒకే ఒక్క వికెట్ తీశాడు.మూడో రోజు ఆట సందర్భంగా కెప్టెన్ రోహిత్ శర్మ.. ఆకాశ్ దీప్‌పై ఆగ్రహం వ్యక్తం చేశాడు. గ్రౌండ్‌లోనే తన కోపాన్ని ప్రదర్శించాడు. ఆస్ట్రేలియా తొలి ఇన్నింగ్స్‌లో బ్యాటింగ్ చేస్తుండగా.. ఆకాశ్ దీప్ 114వ ఓవర్‌ వేసేందుకు వచ్చాడు. అలెక్స్ కేరీ బ్యాటింగ్ చేస్తుండగా.. భారీ వైడ్ వేశాడు. ఎంతలా అంటే బంతి వేయార్డ్‌ (పిచ్‌)ను దాటి అవతల పిచ్‌ అయింది. వికెట్ కీపర్‌ డైవ్‌ చేసి.. బంతి ఫోర్‌ వెళ్లకుండా ఆపాడు.
అప్పటికే వికెట్లు పడటం లేదని కోపంతో ఉన్న రోహిత్ శర్మ.. ఈ ఘటనతో ఒక్కసారిగా సీరియస్ అయ్యాడు. ‘మెదడులో ఏమన్నా ఉందా..’ అని ఆకాశ్ దీప్‌ను తిట్టేశాడు. “అబే, స‌ర్ మె కుచ్ హై” అని రోహిత్ శర్మ తిట్టినట్లు స్టంప్ మైక్‌లో రికార్డయింది. ఈ వీడియో సోషల్‌ మీడియాలో వైరల్‌గా మారింది.
మూడో టెస్టు మూడో రోజు ఆట ముగిసే సమయానికి భారత్ తొలి ఇన్నింగ్స్‌లో 51/4 స్కోరుతో నిలిచింది. తొలి ఇన్నింగ్స్‌లో ఆస్ట్రేలియా 445 పరుగులు చేసింది. ఆ తర్వాత బరిలోకి దిగిన భారత్‌కు ఆదిలోనే షాక్ తగిలింది. వర్షం కారణంగా మూడో రోజు 17 ఓవర్లు మాత్రమే బ్యాటింగ్ చేసిన భారత్.. యశస్వి జైశ్వాల్‌, శుభ్‌మన్‌ గిల్, విరాట్ కోహ్లీ, రిషభ్ పంత్‌లు వికెట్లు కోల్పోయింది. ప్రస్తుతం క్రీజులో కేఎల్‌ రాహుల్ (33), రోహిత్ శర్మ (0) ఉన్నారు.
గబ్బా టెస్టులో ఫాలో ఆన్‌ గండం నుంచి తప్పించుకోవాలంటే భారత్ 246 పరుగులు చేయాలి. అంటే ఇంకా 195 పరుగులు అవసరం. ప్రస్తుతం క్రీజులో ఉన్న రాహుల్, రోహిత్ కాకుండా ప్రధాన బ్యాటర్లు నితీశ్‌ రెడ్డి, రవీంద్ర జడేజాలు బ్యాటింగ్‌కు రావాల్సి ఉంది.
