Kamal Haasan: లెజెండరీ నటుడు కమల్ హాసన్‌కు ఆస్కార్ అకాడమీ సభ్యత్వం లభించింది. ఈ సందర్భంగా పవన్ కల్యాణ్ హృదయపూర్వక శుభాకాంక్షలు తెలిపారు. కమల్ రిప్లై ఇప్పుడు వైరల్‌గా మారింది.
భారతీయ సినిమా దిగ్గజం కమల్ హాసన్‌కు అరుదైన గౌరవం దక్కింది. ఆస్కార్ అవార్డ్స్‌ను నిర్వహించే అకాడమీ ఆఫ్ మోషన్ పిక్చర్ ఆర్ట్స్ అండ్ సైన్సెస్ (AMPAS) సభ్యుడిగా ఆహ్వానం అందుకున్నారు. ఈ సందర్భంగా ఆంధ్రప్రదేశ్ ఉపముఖ్యమంత్రి, జనసేన అధినేత పవన్ కల్యాణ్ సోషల్ మీడియా వేదికగా కమల్‌ను అభినందించారు. ఆరు దశాబ్దాల సినీ ప్రస్థానంలో నటుడిగా, దర్శకుడిగా, కథకుడిగా కమల్ చూపిన అసాధారణ ప్రతిభ భారతీయ, అంతర్జాతీయ సినిమాపై గాఢమైన ముద్ర వేసిందని పవన్ కొనియాడారు. ఈ అభినందనలకు కమల్ హాసన్ హృదయపూర్వకంగా స్పందించారు.
పవన్‌ను సోదరుడిగా సంబోధిస్తూ, ఆస్కార్ వేదికపై భారతీయ సినిమాను ప్రాతినిధ్యం వహించడం గర్వకారణమని పేర్కొన్నారు. ఈ రిప్లై ఇప్పుడు ఇద్దరు హీరోల అభిమానుల మధ్య వైరల్‌గా మారింది. కమల్ హాసన్ ఇటీవల మణిరత్నం దర్శకత్వంలో ‘థగ్ లైఫ్’ చిత్రంలో నటించినప్పటికీ, ఆ చిత్రం బాక్సాఫీస్ వద్ద నిరాశపరిచింది. అయినప్పటికీ, కమల్ సినీ సహకారం అపారమని పవన్ పేర్కొన్నారు.
