ఫుట్బాల్ సామ్రాజ్యంలో రికార్డుల వేటగాడు, సాకర్ మాంత్రికుడు లియోనల్ మెస్సి చరిత్రను తిరగరాశాడు. తన పాదాల మ్యాజిక్తో మరో అద్భుత ప్రపంచ రికార్డును తన ఖాతాలో వేసుకున్నాడు. కెరీర్లో చివరి ప్రపంచకప్ ఆడుతున్న మెస్సి.. అభిమానుల అంచనాలను మించి దూసుకుపోతున్నాడు. తాజాగా జరిగిన ఫిఫా ప్రపంచకప్ గ్రూప్ లీగ్ చివరి మ్యాచ్లో డిఫెండింగ్ ఛాంపియన్ అర్జెంటీనా 3-1 గోల్స్ తేడాతో జోర్డాన్పై ఘనవిజయం సాధించింది.
ఈ మ్యాచ్లో అర్జెంటీనా ముందే నాకౌట్కు చేరడంతో మెస్సి ప్రారంభంలో బెంచ్కే పరిమితమయ్యాడు. కానీ, ద్వితీయార్ధంలో 60వ నిమిషంలో అతను సబ్స్టిట్యూట్గా మైదానంలో అడుగుపెట్టడంతో స్టేడియం మొత్తం మెస్సి నామస్మరణతో హోరెత్తిపోయింది. వచ్చిన 20 నిమిషాల్లోనే, అంటే మ్యాచ్ 80వ నిమిషంలో లభించిన ఫ్రీ కిక్ను ఎడమకాలితో స్పిన్ చేస్తూ జోర్డాన్ డిఫెండర్లను మురిపిస్తూ మెస్సి చేసిన గోల్ మ్యాచ్కే హైలైట్గా నిలిచింది. ఈ గోల్తో ప్రపంచకప్ చరిత్రలో వరుసగా ఏడు మ్యాచ్ల్లో గోల్స్ సాధించిన ప్రపంచపు తొలి ఆటగాడిగా మెస్సి రికార్డు సృష్టించాడు.
అర్జెంటీనా జట్టులో మిగతా రెండు గోల్స్ను లో సెల్సో, లాటారో మార్టినెజ్లు సాధించగా, గ్రూప్ దశను అర్జెంటీనా ఘనంగా ముగించింది. ఇక జులై 4న జరగబోయే హై-వోల్టేజ్ ప్రిక్వార్టర్స్ పోరులో కేప్ వెర్డె జట్టుతో అర్జెంటీనా తలపడనుంది.
