VRS for Wife: రాజస్థాన్‌లో విషాద ఘటన చోటుచేసుకుంది. అనారోగ్యంతో బాధపడుతున్న తన భార్య బాగోగులు చూసుకునేందుకు ఓ భర్త ప్రభుత్వ ఉద్యోగానికి స్వచ్ఛంద పదవీ విరమణ తీసుకున్నాడు. ఇక నుంచి ఆమెతో గడపాలని భావించాడు. కానీ.. పదవీ విరమణ సందర్భంగా ఏర్పాటు చేసిన ఫంక్షన్‌లోనే ఆమె మృతిచెందడం తోటివారందర్నీ కలచివేసింది.
రాజస్థాన్‌లోని కోటాకు చెందిన దేవేంద్ర సందాల్‌ కేంద్ర గిడ్డంగుల విభాగంలో పనిచేస్తున్నారు. భార్య దీపిక గృహిణి. కొంతకాలంగా ఆమె హృదయ సంబంధిత సమస్యలతో బాధపడుతున్నారు. వారికి సంతానం లేకపోవడంతో భార్య బాగోగులు చూసుకోవాలని భావించిన దేవేంద్ర.. మూడేళ్లు ముందుగానే తన ఉద్యోగానికి రిజైన్‌ చేశారు. రిటైర్మెంట్ ఫంక్షన్‌ను ఆఫీసులోనే నిర్వహించారు. ఆ కార్యక్రమానికి భార్య దీపికను కూడా తీసుకెళ్లారు.
దేవేంద్ర దంపతులను కుర్చీలో కూర్చోబెట్టిన ఉద్యోగులు.. వారిని పూలమాలలతో సత్కరిస్తున్నారు. ఒక్కొక్కరుగా ఫొటోలు దిగుతున్నారు. ఇలా సరదాగా సాగుతుండగానే దీపిక కుర్చీలో ఒక్కసారిగా వెనక్కి పడిపోయారు. వెంటనే ఆమెను ఆసుపత్రికి తీసుకెళ్లగా.. అప్పటికే ప్రాణాలు కోల్పోయినట్లు వైద్యులు ధ్రువీకరించారు. దీంతో దేవేంద్రతోపాటు వారి సన్నిహితుల్లో తీవ్ర విషాదం నెలకొంది.
