తెలుగు చిత్ర పరిశ్రమను వణికిస్తున్న పేరు ‘ఐబొమ్మ’. కొన్నాళ్ల క్రితం ఈ వెబ్ సైట్ శాశ్వతంగా మూతపడిందని అందరూ ఊపిరి పీల్చుకున్నారు. కానీ.. ఇప్పుడు ఆ వెబ్సైట్ మళ్ళీ ప్రత్యక్షం కావడం సోషల్ మీడియాలో హాట్ టాపిక్ అయింది. అసలు ఇది ఎలా సాధ్యం? ఈ వ్యవహారం వెనుక ఉన్న అసలు సూత్రధారి ఎవరు? అనే ప్రశ్నలు సినీ వర్గాలను తీవ్రంగా కలవరపెడుతున్నాయి.
పైరసీ భూతాన్ని తరిమికొట్టే క్రమంలో సైబర్ క్రైమ్ పోలీసులు గతంలో తీవ్రంగా శ్రమించారు. ఈ క్రమంలోనే ఐబొమ్మ కార్యకలాపాలను నిర్వహిస్తున్న ఇమ్మడి రవి అనే వ్యక్తిని అదుపులోకి తీసుకున్నారు. ఆయన అరెస్టుతో ఈ వెబ్ సైట్ కథ ముగిసిందని.. ఇక పైరసీ సినిమాల బెడద ఉండదని నిర్మాతలు భావించారు. దానికి తగ్గట్టుగానే సదరు వెబ్ సైట్ తమ సేవలను నిలిపివేస్తున్నట్లు అధికారికంగా ఒక ప్రకటన జారీ చేసింది. ఆ ప్రకటనతో ఐబొమ్మ చాప్టర్ క్లోజ్ అయిందని సామాన్య ప్రేక్షకులు కూడా నమ్మారు.
అయితే ఇప్పుడు పరిస్థితులు ఒక్కసారిగా మారిపోయాయి. జైలులో ఉన్న రవి ఇటీవల బెయిల్తో బయటకు వచ్చాడు. ఆయన బయట ఉన్న ఈ సమయంలోనే ఐబొమ్మ సైట్ లో మళ్ళీ కదలిక రావడం కేవలం యాదృచ్ఛికమేనా లేక పక్కా ప్రణాళికా? అన్నది ఇప్పుడు పెద్ద చర్చకు దారితీస్తోంది.
ఈ వెబ్ సైట్ లో ఇప్పుడు పాత సినిమాలే కాకుండా.. థియేటర్లలో విడుదలైన కొన్ని గంటలకే కొత్త సినిమాలు హై క్వాలిటీతో ప్రత్యక్షం అవుతున్నాయి. రవికి దీనితో నేరుగా సంబంధం ఉందా? లేక ఆయన పేరు వాడుకుని వేరే వ్యక్తులు ఈ దందాను నడుపుతున్నారా? అనే కోణంలో పోలీసులు ఆరా తీస్తున్నారు.
సైబర్ క్రైమ్ పోలీసులు ఎన్ని వెబ్ సైట్లను బ్లాక్ చేస్తున్నా, డొమైన్ పేర్లు మారుస్తూ ఐబొమ్మ మళ్ళీ మళ్ళీ పుట్టుకొస్తోంది. ఇది ఒక్క వ్యక్తి చేసే పనిలా కనిపించడం లేదు. దీని వెనుక ఒక పెద్ద నెట్వర్క్ పనిచేస్తోందనే అనుమానాలు ఉన్నాయి. అత్యాధునిక సాంకేతిక పరిజ్ఞానాన్ని అడ్డు పెట్టుకుని విదేశీ సర్వర్ల సాయంతో ఈ అక్రమ కార్యకలాపాలను కొనసాగిస్తున్నారు. కఠినమైన చట్టాలు అమలులో ఉన్నా, అరెస్టులు జరుగుతున్నా… సినిమా రంగాన్ని దెబ్బతీసేలా ఈ పైరసీ ముఠా వ్యవహరిస్తోంది.
కోట్లాది రూపాయల ఖర్చుతో సినిమాలు తీసే నిర్మాతలకు ఈ పరిణామం అశనిపాతం లాంటిది. ప్రేక్షకులు థియేటర్లకు రాకుండా ఇంట్లోనే పైరసీ వెర్షన్లు చూడటం వల్ల చిత్ర పరిశ్రమ ఆర్థికంగా కుప్పకూలే ప్రమాదం ఉంది. ఐబొమ్మ మళ్ళీ యాక్టివ్ కావడం వల్ల ముఖ్యంగా చిన్న సినిమాల మనుగడ ప్రశ్నార్థకంగా మారింది. ఈ వెబ్ సైట్ మూలాలను తెలుసుకుని దాన్ని శాశ్వతంగా నిర్మూలించడం ఇప్పుడు పోలీసులకు ఒక పెద్ద సవాల్గా మారింది.
డిజిటల్ యుగంలో పైరసీని అరికట్టడం కత్తి మీద సాము లాంటిది. ఒక లింక్ బ్లాక్ చేస్తే మరో పది లింకులు పుట్టుకొస్తున్నాయి. ఐబొమ్మ వంటి సైట్లు టెలిగ్రామ్ గ్రూపుల ద్వారా కూడా తమ లింకులను వ్యాప్తి చేస్తున్నాయి. ఎంతటి సెక్యూరిటీ ఉన్నా సరే, సినిమా విడుదలైన వెంటనే పైరసీ కాపీలు ఎలా వస్తున్నాయన్నది పెద్ద మిస్టరీగా మారింది. దీని వెనుక థియేటర్ యాజమాన్యాల పొరపాట్లు ఉన్నాయా లేక పోస్ట్ ప్రొడక్షన్ దశలోనే లీకులు జరుగుతున్నాయా అన్నది తేలాల్సి ఉంది.
