Jagityal: మరికొన్ని గంటల్లో పెళ్లి పీటలు ఎక్కాల్సిన ఓ యువకుడు అనంత లోకాల్లో కలిసిపోయాడు. పచ్చని పందిరిలో అంగరంగ వైభవంగా జరగాల్సిన పెళ్లి.. వరుని ఆత్మహత్యతో, బంధువుల రోదనలతో విషాదంగా మారింది. కొన్నిరోజులుగా ఆనందంగా గడిపిన కుటుంబం ఒక్కసారిగా శోకసముద్రంలో మునిగిపోయింది. జగిత్యాల జిల్లాలో జరిగిన ఈ ఘటన అందర్నీ కలచి వేస్తుంది.
మెట్‌పల్లి మండలం వెల్లుల్ల గ్రామానికి చెందిన కిరణ్‌కు అదే గ్రామానికి చెందిన ఓ యువతితో వారం రోజుల క్రితం నిశ్చితార్థం జరిగింది. రేపు ఉదయం 10కి పెళ్లి ముహూర్తం పెట్టుకు న్నారు. అయితే నిన్న ఉదయం వధువు, వరుడు ఇద్దరు కలిసి ఫోటో షూట్‌కు కూడా వెళ్ళారు. అప్పటి వరకు అంతా బాగానే ఉన్నా అంతలోనే ఏం జరిగిందో తెలియదు కానీ వరుడు కిరణ్ ఆత్మహత్యకు పాల్పడ్డాడు.
కిరణ్ తన ఇంటిలోనే రాత్రి ఉరేసుకుని చనిపోయాడు. గమనించిన కుటుంబ సభ్యులు పోలీసులకు సమాచారం అందించారు. ఘటనా స్థలానికి చేరుకున్న పోలీసులు మృతదేహాన్ని పోస్టు మార్టం నిమిత్తం మెట్‌పల్లి ప్రభుత్వ ఆసుపత్రికి తరలించారు. కేసు నమోదు చేసిన పోలీసులు వివరాలు ఆరా తీస్తున్నారు. కిరణ్ మృతితో గ్రామంలో విషాద ఛాయలు అలుముకున్నాయి.
