US : అమెరికాలో ఉద్యోగం చేయాలని కలలు కనే యువతకు బైడెన్‌ తీపికబురు.. హెచ్1బీ వీసాలు మరింత సరళతరం
అమెరికాలో ఉద్యోగమంటే మనకు ఎనలేని క్రేజ్‌. చదవు అయిపోగానే అమెరికా వైపు చూస్తుంటాం. ఈ క్రమంలో.. అమెరికాలో ఉద్యోగం చేయాలని కలలు కనే యువతకు బైడెన్‌ (Joe Biden) కార్యవర్గం తీపికబురు చెప్పింది. మరింత సులభంగా ప్రత్యేక నిపుణులైన విదేశీయులను నియమించుకొనేందుకు అమెరికా కంపెనీలకు అవకాశం కల్పిస్తూ నిబంధనల్లో మార్పులు చేసింది. దీంతో పాటు సులువుగా ఎఫ్-1 స్టూడెంట్‌ వీసా (Study in USA)లను హెచ్-1బీ వీసా (H-1B visa)లుగా మార్చుకొనే అవకాశం కూడా కల్పించింది. ఇది లక్షల మంది ఇండియన్‌ వర్కింగ్‌ ప్రొఫెషనల్స్‌కు లాభదాయకం కానుంది.
తాజా నిర్ణయంతో అమెరికా కంపెనీలకు విదేశీ నిపుణులు, ఉద్యోగులను నియమించుకోవడం మరింత సులభతరం కానుంది. మరోవైపు ఎప్-1 విద్యార్ధి వీసాలు హెచ్-1బీగా మారేందుకు వెసులుబాటు కల్పించింది. దీని వల్ల వేలాది మంది భారతీయ టెక్ నిపుణులకు ప్రయోజనం చేకూరనుంది. విదేశీ వర్కర్లను అమెరికా కంపెనీల్లో పనిచేయడానికి హెచ్-1బీ వీసా అనుమతిస్తున్న విషయం తెలిసిందే.
హెచ్-1బీ వీసా నాన్‌ ఇమిగ్రెంట్‌ కేటగిరీలోకి వస్తుంది. అమెరికా టెక్నాలజీ కంపెనీలు విదేశీ వృత్తి నిపుణులను దీని సాయంతో నియమించుకుంటూ ఉంటాయి. ప్రతి ఏటా భారత్, చైనా వంటి దేశాలకు చెందిన వేలాది నిపుణులను హెచ్1 బీ వీసా ఆధారంగానే నియమించుకుంటాయి. దీంతో భారత్, చైనా దేశాలు మరింత లబ్ధి పొందనున్నాయి. ఈనేపథ్యంలో కంపెనీలకు సౌలభ్యం కల్పించేలా డిపార్ట్‌మెంట్‌ ఆఫ్‌ హోమ్‌ల్యాండ్‌ సెక్యూరిటీ సరికొత్త నిబంధనలను ప్రకటించింది. దీని ప్రకారం నాన్‌ప్రాఫిట్‌, ప్రభుత్వేతర పరిశోధన సంస్థల నిర్వచనం, నిబంధనల్లో మార్పులు చేసింది.
తాజాగా ప్రకటించిన కొత్త నిబంధన ప్రకారం ఎఫ్-1 స్టూడెంట్‌ వీసాలను తేలిగ్గా హెచ్-1బీ వీసాలుగా మార్చుకొనే అవకాశం లభిస్తుంది. ఇప్పటివరకు ఎఫ్-1 వీసాలకు ఉన్న చట్టపరమైన అడ్డంకులు తొలగినట్లయ్యింది. దీంతోపాటు గతంలోనే హెచ్1బీ వీసా పొందినవారి పౌరసత్వం, ఇమిగ్రేషన్‌ సేవలకు సంబంధించిన దరఖాస్తులను వేగంగా ప్రాసెస్‌ చేయనున్నారు. అమెరికాలోని వ్యాపార సంస్థలకు కార్మికుల అవసరాలు తీర్చడమే కాకుండా.. ఆ సంస్థలపై పడుతున్న అనవసర ఆర్థిక భారం కూడా తగ్గుతుండటంతో బైడెన్‌ ఈ నిర్ణయం తీసుకొన్నట్లు తెలుస్తోంది. ఈ నిబంధనలు 2025 జనవరి 17 నుంచి అమలు కానున్నాయి.
ఈ సందర్భంగా అమెరికా సిటిజన్‌ షిప్‌ అండ్‌ ఇమిగ్రేషన్‌ సర్వీసెస్‌ డైరెక్టర్‌ జడ్డూ స్పందిస్తూ.. ‘1990లో అమెరికా కాంగ్రెస్‌ హెచ్1బీ వీసాల జారీ కార్యక్రమాన్ని మొదలుపెట్టింది. కాలానుగుణంగా దేశ ఆర్థిక వ్యవస్థలకు ప్రయోజనం ఉండేలా దాన్ని ఆధునికీకరించాల్సిన అవసరం ఉంది’ అని పేర్కొన్నారు.
