రష్యా-ఉక్రెయిన్ యుద్ధం ఇప్పుడు మరింత తీవ్రరూపం దాల్చుతోంది. రష్యాలోని కీలక ఇంధన కేంద్రాలే లక్ష్యంగా ఉక్రెయిన్ డ్రోన్లు విరుచుకుపడుతున్నాయి. తాజా సమాచారం ప్రకారం, రష్యాలోని ప్రసిద్ధ పర్యాటక నగరం మరియు నల్లసముద్ర తీరప్రాంతమైన సోచ్ లోని చమురు డిపోపై ఉక్రెయిన్ డ్రోన్ దాడి చేసింది. ఈ దాడిలో ఒక భారీ చమురు ట్యాంకర్ పేలిపోయి, సుమారు 100 చదరపు మీటర్ల మేర మంటలు వ్యాపించాయి.
ఈ ఘటనలో దాదాపు 1200 టన్నుల డీజిల్ నిల్వ ఉన్న ట్యాంకర్ అగ్నిప్రమాదానికి గురైనట్లు తెలుస్తోంది. మంటలను అదుపు చేసేందుకు 120 మందికి పైగా అగ్నిమాపక సిబ్బంది తీవ్రంగా శ్రమిస్తున్నారు. భద్రతా కారణాల దృష్ట్యా సోచ్ అంతర్జాతీయ విమానాశ్రయంలో విమాన రాకపోకలను అధికారులు తాత్కాలికంగా నిలిపివేశారు.
రష్యా ఆర్థిక మూలాలను దెబ్బతీసే వ్యూహంలో భాగంగానే ఉక్రెయిన్ వరుసగా ఈ డ్రోన్ దాడులకు పాల్పడుతోందని విశ్లేషకులు భావిస్తున్నారు. ఈ దాడి కారణంగా ఎవరికీ ప్రాణనష్టం జరగలేదని రష్యా అధికారులు వెల్లడించినప్పటికీ, భారీగా ఆస్తి నష్టం జరిగినట్లు సమాచారం. ఈ డ్రోన్ దాడులతో రష్యాలోని నొవోరోసిస్క్ వంటి ఇతర రేవు పట్టణాలు కూడా ప్రస్తుతం హై అలర్ట్లో ఉన్నాయి.
