Telangana: తెలంగాణ రాష్ట్రంలో స్థానిక సంస్థల ఎన్నికల నిర్వహణపై సర్కారు కసరత్తు ముమ్మరం చేసింది. జూన్ చివరి వారంలో లేదా జులై మొదటి వారంలో పంచాయతీ ఎన్నికలు నిర్వహించాలని ప్రభుత్వం ప్రణాళికలు రచిస్తోంది. ఈ పంచాయతీ ఎన్నికల ప్రక్రియ పూర్తయిన వెంటనే ఎంపీటీసీ, జెడ్పీటీసీ, మున్సిపాలిటీలకు కూడా వరుసగా ఎన్నికలు నిర్వహించాలని ఆలోచిస్తోంది. ఈ మొత్తం ప్రక్రియకు అవసరమైన సన్నాహాల్లో భాగంగానే ముఖ్యమంత్రి రేవంత్ రెడ్డి జిల్లాల పర్యటనలు, నియోజకవర్గాల వారీగా ఎమ్మెల్యేలతో వన్-టూ-వన్ భేటీలు జరుపుతున్నారు.
అంతేకాకుండా, ప్రజలకు చేరువయ్యేందుకు కొన్ని ముఖ్యమైన పథకాల అమలును వేగవంతం చేస్తూ, పెండింగ్ బిల్లులను క్లియర్ చేస్తోంది రేవంత్ సర్కార్. ఈ పరిణామాలన్నీ రాబోయే స్థానిక ఎన్నికలకు రంగం సిద్ధం చేస్తున్నాయని రాజకీయ విశ్లేషకులు భావిస్తున్నారు.
రేవంత్ సర్కార్ స్థానిక ఎన్నికలకు సన్నద్ధమవుతున్న తీరు ప్రభుత్వ చర్యల ద్వారా స్పష్టమవుతోంది. ముఖ్యంగా గ్రామ పంచాయతీలకు 153 కోట్ల రూపాయల పెండింగ్ బిల్లులను ఇటీవల విడుదల చేయడం, అలాగే త్వరలో మరో 300 కోట్లకు పైగా బకాయిలను కూడా విడుదల చేసేందుకు ఏర్పాట్లు చేయడం ఎన్నికల సన్నాహాల్లో భాగమేనని తెలుస్తోంది. ఈ నిధుల విడుదల ద్వారా స్థానిక సంస్థల ఆర్థిక వ్యవస్థను బలోపేతం చేసి ప్రజల్లో ప్రభుత్వానికి అనుకూలమైన వాతావరణాన్ని సృష్టించాలనేది ప్రభుత్వ ఆలోచన.
మరోవైపు యువతను ఆకట్టుకునేందుకు రాజీవ్ యువ వికాసం కార్యక్రమాన్ని జూన్ 2 నుంచి ప్రారంభించనున్నారు. దీని ద్వారా 5 లక్షల మంది యువతకు స్వయం ఉపాధి కల్పించాలని లక్ష్యంగా పెట్టుకున్నారు. ఈ పథకం ద్వారా స్థానిక యువతతో పాటు కాంగ్రెస్ పార్టీ శ్రేణులకు కూడా ప్రయోజనం చేకూరుతుందని అంచనా వేస్తున్నారు.
అంతేకాకుండా జూన్ నెలలోనే వీలైనంత మంది అర్హులైన లబ్ధిదారులకు రేషన్ కార్డులు పంపిణీ చేయాలని, పెండింగ్‌లో ఉన్న రైతు భరోసా నిధులను కూడా రైతుల ఖాతాల్లో జమ చేయాలని ప్రభుత్వం నిర్ణయించింది. ఈ సంక్షేమ కార్యక్రమాలన్నీ రాబోయే ఎన్నికల్లో ప్రజల మద్దతు కూడగట్టుకోవడానికి ఉద్దేశించినవిగా విశ్లేషకులు భావిస్తున్నారు.
ముఖ్యమంత్రి రేవంత్ రెడ్డి జిల్లాల పర్యటనలు, నియోజకవర్గాల వారీగా ఎమ్మెల్యేలతో భేటీలు కూడా స్థానిక ఎన్నికల సన్నద్ధతలో కీలకమైన వ్యూహాత్మక అడుగులుగా కనిపిస్తున్నాయి. గత కొన్ని వారాలుగా సీఎం వివిధ జిల్లాల్లో పర్యటిస్తూ, పలు అభివృద్ధి పనులకు శంకుస్థాపనలు, ప్రారంభోత్సవాలు చేస్తున్నారు. ఈ పర్యటనల్లో ఆయా నియోజకవర్గాల ఎమ్మెల్యేల ద్వారా స్థానిక సమస్యలను తెలుసుకొని వాటి పరిష్కారానికి హామీ ఇస్తున్నారు. ఇది ప్రజల్లో ప్రభుత్వ పనితీరుపై సానుకూల దృక్పథాన్ని కలిగిస్తుంది.
ఎమ్మెల్యేలతో జరిగిన భేటీల్లో కూడా ఎన్నికల సన్నద్ధత, స్థానిక నాయకులతో సమన్వయం, ప్రజల్లోకి తీసుకెళ్లాల్సిన ప్రభుత్వ సందేశాల గురించి ప్రధానంగా చర్చించినట్లు తెలుస్తోంది. ఈ సమావేశాల్లోనే జూన్ చివరలో లేదా జులై మొదటి వారంలో స్థానిక ఎన్నికలు ఉంటాయని ప్రస్తావనకు వచ్చినట్లు రాజకీయ వర్గాల్లో చర్చ జరుగుతోంది. మంత్రులు, ఎమ్మెల్యేలు కూడా వివిధ అభివృద్ధి, పార్టీ కార్యక్రమాలతో తమ నియోజకవర్గాల్లో విస్తృతంగా పర్యటిస్తున్నారు. స్థానిక కేడర్‌ను ఉత్తేజ పరుస్తున్నారు.
గ్రామ పంచాయతీల పాలకవర్గాల గడువు గత ఏడాది ఫిబ్రవరిలోనే ముగిసినప్పటికీ దాదాపు ఏడాదిన్నరగా ఎన్నికలు జరగలేదు. దీనివల్ల కేంద్ర ప్రభుత్వం నుంచి వచ్చే 15వ ఆర్థిక సంఘం నిధులు 16 వందల కోట్లకు పైగా నిలిచిపోయాయి. పాలకవర్గాలు ఏర్పడితేనే ఈ నిధులు విడుదలవుతాయి. ఇది పల్లెల్లో అభివృద్ధి పనులకు తీవ్ర ఆటంకంగా మారింది. అదేవిధంగా మండల పరిషత్, జిల్లా పరిషత్ పాలకవర్గాల గడువు నిరుడు జులైలో మున్సిపాలిటీలు, కార్పొరేషన్ల గడువు గత నెలలోనే ముగిశాయి. వీటికి కూడా ఫైనాన్స్ కమిషన్ నిధులు నిలిచిపోయాయి.
ప్రస్తుతం అన్నిచోట్లా ఇన్‌ఛార్జ్‌ల పాలన నడుస్తుండటం ఒక అధికారి ఐదారు పంచాయతీలు, మండలాలు, మున్సిపాలిటీలను పర్యవేక్షిస్తుండటంతో అభివృద్ధి పనులకు ఇబ్బందులు ఎదురవుతున్నాయి. పరిస్థితి ఇలాగే కొనసాగితే స్థానిక సంస్థల్లో అభివృద్ధి పనులకు ఆటంకం కలుగుతుందని ప్రజల్లో వ్యతిరేకత వచ్చే ప్రమాదం ఉందని ఇంటెలిజెన్స్ వర్గాలు ప్రభుత్వానికి నివేదించినట్లు తెలుస్తోంది.
మరోవైపు కాంగ్రెస్ పార్టీ పదేళ్ల తర్వాత అధికారంలోకి రావడంతో గ్రామాల్లోని పార్టీ కార్యకర్తలు స్థానిక పదవులపై ఎన్నో ఆశలు పెట్టుకున్నారు. ముఖ్యంగా సర్పంచ్, ఎంపీటీసీ, జెడ్పీటీసీ, ఎంపీపీ లాంటి పదవులు దక్కితే పార్టీ మరింత బలపడుతుందని కాంగ్రెస్ పెద్దలు భావిస్తున్నారు. ఈ పరిస్థితులన్నింటి నేపథ్యంలో ఎన్నికల నిర్వహణ త్వరలో ఉంటుంద‌నే టాక్ విన‌బ‌డుతోంది.
స్థానిక ఎన్నికల నిర్వహణలో ప్రధాన సవాళ్లలో ఒకటి బీసీ రిజర్వేషన్లు. వాస్తవానికి, కాంగ్రెస్ ప్రభుత్వం అసెంబ్లీ ఎన్నికల మేనిఫెస్టోలో ఇచ్చిన హామీ మేరకు బీసీలకు స్థానిక సంస్థల ఎన్నికల్లో 42 శాతం రిజర్వేషన్లు కల్పించాకే ఎన్నికలకు వెళ్లాలని నిర్ణయించింది. ఇందుకోసం సమగ్ర కులగణన సర్వే చేపట్టి.. బీసీలకు విద్య, ఉద్యోగాలు, స్థానిక సంస్థల్లో 42 శాతం రిజర్వేషన్లు కల్పించే బిల్లులను అసెంబ్లీలో ఆమోదించింది.
అయితే ఈ రెండు బీసీ బిల్లులు రాష్ట్రపతి ఆమోదం కోసం పెండింగ్‌లో ఉన్నాయి. ఇటీవల కేంద్ర కేబినెట్ దేశవ్యాప్తంగా జనగణనతో పాటు కులగణన చేసేందుకు అంగీకరించిన నేపథ్యంలో ఈ ప్రక్రియ పూర్తవడానికి మరో ఏడాదిన్నర సమయం పట్టే అవకాశం ఉంది. దీంతో రాష్ట్రం చేసిన కులగణన ఆధారంగా పంపిన బీసీ రిజర్వేషన్ల బిల్లులను రాష్ట్రపతి ఆమోదిస్తారా లేదా అనేది ప్రశ్నార్థకంగా మారింది.
పార్టీ పరంగానే బీసీలకు 42 శాతం రిజర్వేషన్లు ఇచ్చి స్థానిక సంస్థల ఎన్నికలకు వెళ్లాలని ప్రభుత్వం సూత్రప్రాయంగా నిర్ణయించినట్లు విశ్వసనీయ వర్గాల సమాచారం. దీని ద్వారా తప్పని పరిస్థితుల్లో ఇతర పార్టీలు కూడా బీసీలకు అంతే మొత్తంలో రిజర్వేషన్లు ఇవ్వాల్సిన పరిస్థితి ఏర్పడుతుందని దాంతో బీసీలకు 42 శాతం రిజర్వేషన్లు కల్పించినట్లు అవుతుందని కాంగ్రెస్ వర్గాలు భావిస్తున్నాయి. ఈ వ్యూహం ద్వారా రిజర్వేషన్ల సమస్యను దాటుకుని ఎన్నికల నిర్వహణకు సిద్ధమవుతున్నారు.
ఎన్నికల తేదీలపై అధికారులు రాష్ట్ర ప్రభుత్వానికి మూడు ప్రతిపాదనలను అందజేశారు. జూన్ చివరలో లేదా జులై మొదటి వారంలో పంచాయతీ ఎన్నికలు పూర్తి చేయడం ఆ తర్వాత వెంటనే ఎంపీటీసీ, జెడ్పీటీసీ ఎన్నికలకు వెళ్లడం ఒక ప్రతిపాదన కాగా ముందుగా ఎంపీటీసీ, జెడ్పీటీసీ ఎన్నికలు నిర్వహించి, ఆ తర్వాత పంచాయతీ ఎన్నికలు పెట్టాలనేది మరో ప్రపోజల్.
ఏదేమైనా రాష్ట్ర ఎన్నికల సంఘం స్థానిక ఎన్నికలకు అన్నివిధాలా సిద్ధమైంది. తేదీలు, రిజర్వేషన్ల ప్రకటన కోసం ఎదురుచూస్తోంది. స్థానిక ఎన్నిక‌ల‌ను మూడు ప్రధాన పార్టీలు ప్ర‌తిష్టాత్మ‌కంగా తీసుకునే అవకాశం క‌నిపిస్తోంది.
