రోహిత్ శర్మ బోర్డర్ గవాస్కర్‌ ట్రోఫీలో దారుణంగా విఫలమవుతున్నాడు. తన భార్య రెండో బిడ్డకు జన్మనివ్వడంతో తొలి టెస్టుకు దూరమైన కెప్టెన్ రోహిత్.. రెండో టెస్టు నుంచి అందుబాటులోకి వచ్చాడు. అయితే వరుసగా మూడు ఇన్నింగ్స్‌లలో అతడు దారుణంగా విఫలమయ్యాడు. కేఎల్ రాహుల్ ఓపెనింగ్‌ స్థానంలో సెట్ కావడంతో ఆరో స్థానంలో బ్యాటింగ్‌కు వస్తున్న రోహిత్ శర్మ ఏమాత్రం ప్రభావం చూపలేకపోయాడు. బ్యాటింగ్ స్థానం మార్చడమో, ఏంటో తెలీదు గానీ.. వరుసగా విఫలమవుతున్నాడు.
గబ్బా టెస్టులోనూ జట్టు కష్టాల్లో ఉన్నప్పుడు క్రీజులోకి వచ్చిన రోహిత్ శర్మ మరోసారి విఫలమయ్యాడు. పేలవమైన షాట్‌ ఆడి.. వికెట్‌ సమర్పించుకున్నాడు. దీంతో నిరాశగా పెవిలియన్ చేరాడు. దీంతో రోహిత్ శర్మ క్రికెట్ కెరీర్‌ చరమాంకానికి చేరుకుందనే ప్రచారం జోరందుకుంది. దీనికి తగ్గట్లు అతడు చేసిన ఓ పని.. ఆ ఊహాగానాలకు మరింత బలం చేకూర్చేలా చేసింది. గబ్బా టెస్టు తొలి ఇన్నింగ్స్‌లో ఔట్‌ అయిన రోహిత్ శర్మ.. తన గ్లోవ్స్‌ను డగౌట్‌ వద్దే పడేసి, డ్రెస్సింగ్‌ రూమ్‌లోకి వెళ్లిపోయాడు. ఇది చూసిన ఫ్యాన్స్ ఆశ్చర్యానికి గురయ్యాడు.
రోహిత్ శర్మ ఎప్పుడూ ఇలా ప్రవర్తించలేదు. వరుసగా విఫలం కావడంతోనే హిట్‌ మ్యాన్ ఇలా చేశాడని.. త్వరలో టెస్టులకు రిటైర్మెంట్ పలుకాతాడనే ప్రచారం మొదలైంది. రెండేళ్ల నుంచి రోహిత్.. స్థాయికి తగ్గ ప్రదర్శన చేయట్లేదు. ఆతడు ఆడిన చివరి 10 టెస్టుల్లో 18 సార్లు బ్యాటింగ్‌కు దిగిన రోహిత్ శర్మ.. కేవలం 621 పరుగులు సాధించాడు. ఇందులో ఒక్క శతకం మాత్రమే ఉంది.
హిట్‌ మ్యాన్ టెస్టు కెరీర్‌లో ఓవరాల్‌ బ్యాటింగ్ సగటు 45 కావడం గమనార్హం. అయితే, గత పది టెస్టుల్లో మాత్రం అది 34కి పడిపోయింది. స్వదేశంలో మెరుగ్గా బ్యాటింగ్ చేసే హిట్‌ మ్యాన్.. విదేశాల్లో మాత్రం దారుణంగా విఫలమవుతున్నాడు. ఇది కాకుండా ఈ ఏడాది జూన్‌లో టీ20 ప్రపంచకప్‌ గెలిచిన వెంటనే రోహిత్ శర్మ పొట్టి ఫార్మాట్‌కు గుడ్‌బై చెప్పేశాడు.
ఛాంపియన్స్‌ ట్రోఫీ గెలిస్తే.. వన్డే ఫార్మాట్‌ నుంచి కూడా రోహిత్ తప్పుకుంటాడనే ప్రచారం జరుగుతోంది. దానికి తోడు ప్రపంచ టెస్టు ఛాంపియన్‌ షిప్‌ తర్వాత సుదీర్ఘ ఫార్మాట్‌కు గుడ్‌బై చెప్పనున్నాడని విశ్లేషణలు వినిపిస్తున్నాయి.
