India vs South Africa: దక్షిణాఫ్రికాతో జరిగిన ఐదు టీ20ల సిరీస్ను టీమిండియా ఘనంగా ముగించింది. అహ్మదాబాద్ వేదికగా జరిగిన ఆఖరి మ్యాచ్లో 30 పరుగుల తేడాతో సౌతాఫ్రికాపై విజయం సాధించింది. ఈ గెలుపుతో సిరీస్ను 3-1 తేడాతో భారత్ కైవసం చేసుకుంది. తొలుత బ్యాటింగ్ చేసిన భారత్ 231 పరుగులు చేసింది. ఆ తర్వాత లక్ష్య ఛేదనకు దిగిన దక్షిణాఫ్రికా నిర్ణీత 20 ఓవర్లలో 8 వికెట్లు కోల్పోయి 201 పరుగులు మాత్రమే చేయగలిగింది. భారత బౌలర్లలో వరుణ్ చక్రవర్తి నాలుగు వికెట్లతో సత్తా చాటగా, బుమ్రా రెండు వికెట్లు పడగొట్టాడు.
భారత్ నిర్దేశించిన 232 పరుగుల భారీ లక్ష్యంతో బరిలోకి దిగిన దక్షిణాఫ్రికాకు.. ఓపెనర్లు క్వింటన్ డికాక్, రీజా హెండ్రిక్స్ శుభారంభం అందించారు. డికాక్ దూకుడుగా ఆడి భారత బౌలర్లపై విరుచుకుపడ్డాడు. కేవలం 35 బంతుల్లో 9 ఫోర్లు, 3 సిక్సర్లతో 65 పరుగులు చేసి జట్టుకు గెలుపుపై ఆశలు రేపాడు. అయితే పవర్ ప్లే ముగిశాక వరుణ్ చక్రవర్తి బౌలింగ్లో హెండ్రిక్స్ ఔటయ్యాడు. కాసేపటికే ప్రమాదకరంగా మారుతున్న డికాక్ను బుమ్రా పెవిలియన్ పంపడంతో దక్షిణాఫ్రికా కష్టాల్లో పడింది.
ఆ తర్వాత వచ్చిన డివాల్డ్ బ్రెవిస్ కాసేపు మెరుపులు మెరిపించినా, కీలక సమయంలో హార్దిక్ పాండ్యా అతడిని ఔట్ చేశాడు. మిడిల్ ఓవర్లలో వరుణ్ చక్రవర్తి తన స్పిన్ మాయాజాలంతో సఫారీ బ్యాటింగ్ ఆర్డర్ను కుప్పకూల్చాడు. కెప్టెన్ మార్క్రమ్, డొనోవాన్ ఫెరీరాలను వరుస బంతుల్లో ఔట్ చేసి మ్యాచ్ను భారత్ వైపు తిప్పాడు. డేవిడ్ మిల్లర్, జార్జ్ లిండే విజయం కోసం ప్రయత్నించినా ఫలితం లేకపోయింది. చివరికి దక్షిణాఫ్రికా 201 పరుగులకే పరిమితమై ఓటమిపాలైంది.
అంతకుముందు టాస్ ఓడి బ్యాటింగ్కు దిగిన టీమిండియాకు ఓపెనర్లు అభిషేక్ శర్మ, సంజూ శాంసన్ శుభారంభాన్ని ఇచ్చారు. పవర్ప్లేలో దూకుడుగా ఆడి స్కోరు బోర్డును పరుగులు పెట్టించారు. ఆ తర్వాత తిలక్ వర్మ, హార్దిక్ పాండ్యా ఆకాశమే హద్దుగా చెలరేగారు. దక్షిణాఫ్రికా బౌలర్లను లక్ష్యంగా చేసుకుని బౌండరీలు, సిక్సర్లతో హోరెత్తించారు.
తిలక్ వర్మ 42 బంతుల్లో 10 ఫోర్లు, ఒక సిక్సర్తో 73 పరుగులు చేశాడు. మరోవైపు హార్దిక్ పాండ్యా కేవలం 25 బంతుల్లో 5 ఫోర్లు, 5 భారీ సిక్సర్లతో 63 పరుగులు చేసి విధ్వంసం సృష్టించాడు. వీరిద్దరూ నాలుగో వికెట్కు 105 పరుగుల కీలక భాగస్వామ్యం నెలకొల్పారు. దీంతో భారత్ నిర్ణీత 20 ఓవర్లలో 5 వికెట్ల నష్టానికి 231 పరుగుల భారీ స్కోరు సాధించింది.
