Arya 2: టాలీవుడ్‌లో రీ-రిలీజ్ ట్రెండ్ జోరుగా సాగుతోంది. ఈ క్రమంలో ఏప్రిల్ 5న, అంటే నేడు, అల్లు అర్జున్ బ్లాక్‌బస్టర్ ‘ఆర్య 2’ గ్రాండ్‌గా రీ-రిలీజ్ అయింది. ఈ సందర్భంగా ఆర్టీసీ క్రాస్ రోడ్స్‌లోని సంధ్య థియేటర్, సుదర్శన్ థియేటర్ వద్ద పోలీసులు భారీ బందోబస్తు ఏర్పాటు చేశారు.
టికెట్ లేకుండా ఎవరినీ థియేటర్‌లోకి అనుమతించడం లేదు. డీజే సౌండ్స్‌కు కూడా అనుమతి లేదు. ‘పుష్ప 2’ సమయంలో జరిగిన అవాంఛనీయ సంఘటనల నేపథ్యంలో, ఫ్యాన్స్ హడావిడి చేయకుండా పోలీసులు కట్టడి చేస్తున్నారు. అడ్వాన్స్ బుకింగ్స్‌లో ‘ఆర్య 2’ సరికొత్త రికార్డు సృష్టించింది. సంధ్య 35mm థియేటర్‌లో కేవలం 2 నిమిషాల్లోనే టికెట్లు హౌస్‌ఫుల్ అయ్యాయి. ఇంత తక్కువ సమయంలో టికెట్లు అమ్ముడవ్వడం టాలీవుడ్‌లో అరుదైన ఘటన.
అల్లు అర్జున్ ఫ్యాన్స్ ఉత్సాహం ఆకాశాన్ని తాకుతోంది. మిగిలిన ప్రాంతాల్లో ఫ్యాన్స్ డీజే సౌండ్స్, ఈలలు, గోలతో సినిమాను ఎంజాయ్ చేస్తున్నారు. ఈ రీ-రిలీజ్ విజయం ‘ఆర్య 2’ సినిమాకు ఇప్పటికీ ఉన్న క్రేజ్‌ను చాటి చెబుతోంది. టాలీవుడ్‌లో రీ-రిలీజ్ ట్రెండ్ ఇలాంటి విజయాలతో మరింత ఊపందుకుంటుందని ట్రేడ్ వర్గాలు అంచనా వేస్తున్నాయి.
