ప్రపంచ వ్యాప్తంగా ‘ది లయన్‌ కింగ్‌’ సినిమాకు మంచి ఆధరణ లభించింది. ఐదేళ్ల తర్వాత ఆ సినిమాకు ప్రీక్వెల్‌గా రూపొందిన ‘ముఫాసా : ది లయన్‌ కింగ్‌’ సినిమా రాబోతుంది. అప్పట్లోనే ప్రపంచ వ్యాప్తంగా సంచలన విజయాన్ని సొంతం చేసుకున్న ది లయన్‌ కింగ్‌ కి ఇండియాలోనూ మంచి ఆధరణ లభించింది. అందుకే ఆ ముఫాసా ని ఇండియాలో భారీ ఎత్తున రిలీజ్ చేసేందుకు ఏర్పాట్లు చేశారు. ఆయా భాషల్లో ముఫాసా పాత్రకి ప్రముఖ స్టార్స్‌తో డబ్బింగ్ చెప్పించడం ద్వారా హైప్‌ క్రియేట్‌ చేసే ప్రయత్నం చేశారు. తెలుగులో మహేష్ బాబుతో డబ్బింగ్ చెప్పించడం ద్వారా భారీ హైప్‌ క్రియేట్‌ అయ్యింది.
ముఫాసా : ది లయన్‌ కింగ్‌ సినిమాలోని లీడ్‌ రోల్‌కి మహేష్ బాబు డబ్బింగ్ చెప్పడంతో ఒక్కసారిగా ప్రేక్షకుల్లో చర్చ మొదలైంది. గతంలో నానితో డబ్బింగ్ చెప్పడంతో సినిమాకు మంచి పబ్లిసిటీ దక్కింది. ఇప్పుడు సూపర్‌ స్టార్‌ మహేష్ బాబుతో డబ్బింగ్ చెప్పించడం ద్వారా తెలుగులో భారీ హైప్‌ క్రియేట్‌ చేశారు. ఈ ఏడాది ఆరంభంలో మహేష్ బాబు గుంటూరు కారం సినిమా వచ్చింది. ఆయన తదుపరి సినిమా రాజమౌళి దక్శకత్వంలో కావడంతో రావడానికి కనీసం ఇంకా రెండేళ్ల సమయం పట్టే అవకాశం ఉంది. కనుక ఆయన వాయిస్ ఓవర్‌తో రాబోతున్న సినిమా కావడంతో ఫ్యాన్స్‌ ఈ సినిమాను చాలా స్పెషల్‌గా చూస్తున్నారు.
గతంలో ఎప్పుడూ లేని విధంగా కేవలం డబ్బింగ్ చెప్పిన మహేష్ బాబుకి ముఫాసా థియేటర్‌ల వద్ద కటౌట్‌ ఏర్పాటు చేస్తున్నారు. తెలుగు రాష్ట్రాల్లో పలు చోట్ల భారీ ఎత్తున కటౌట్‌లు ఏర్పాటు చేస్తున్నారు. ముఖ్యంగా విజయవాడ అప్సరా థియేటర్‌ వద్ద ఏర్పాటు చేసిన 40 అడుగుల భారీ మహేష్ బాబు ముఫాసా కటౌట్‌ అందరి దృష్టిని ఆకర్షిస్తోంది. పెరిగిన జుట్టు, గడ్డం, స్టైలిష్ సూట్‌ అవతార్‌లో మహేష్ బాబు కటౌట్‌ను ఏర్పాటు చేసి అందరి దృష్టిని ఆకర్షిస్తున్నారు. కటౌట్‌లో ముందు సింహం ఉండటంతో మరింత ఆకర్షణీయంగా ఉందని, రెండు సింహాలను సింగిల్‌ కటౌట్‌లో చూడవచ్చు అంటూ ఫ్యాన్స్‌ కామెంట్స్ చేస్తున్నారు. ముఫాసా కోసం బ్రహ్మానందం, అలీ సైతం డబ్బింగ్ చెప్పడం విశేషం.
మహేష్ బాబు ప్రస్తుతం రాజమౌళి సినిమా కోసం రెడీ అవుతున్నారు. గత ఏడాది కాలంగా ఆయన కెమెరా ముందుకు రాలేదు. గత ఏడాది చివర్లో గుంటూరు కారం సినిమా షూటింగ్‌ పూర్తి అయ్యి ఈ ఏడాది ఆరంభంలో సినిమా సంక్రాంతి కానుకగా వచ్చింది. అప్పటి నుంచి ఇప్పటి వరకు మరే సినిమా షూటింగ్‌లో పాల్గొనలేదు. కానీ ముఫాసా కోసం డబ్బింగ్ చెప్పారు. వచ్చే ఏడాది ఆరంభంలోనే మహేష్‌బాబు, రాజమౌళి కాంబో మూవీ పట్టాలెక్కబోతుంది. 2026లో సినిమా ప్రేక్షకుల ముందుకు వచ్చే విధంగా దర్శకుడు రాజమౌళి ప్రయత్నాలు చేస్తున్నారు. అతి త్వరలోనే సినిమా గురించి అధికారికంగా ప్రకటన చేయడం కోసం రాజమౌళి అండ్ టీం మీడియా ముందుకు రాబోతున్నారు.
